سجل دخولك للقسم العام بـحـكـمـتـك لهذا اليوم (اخر مشاركة : البريء - عددالردود : 618 - عددالزوار : 67767 )           »          دعونا نـ ـلون جدراننـ ـا بضجيج أقـ ـلامنــا (اخر مشاركة : البريء - عددالردود : 2079 - عددالزوار : 127640 )           »          [ رَسَائِل ..إلَى مَا لانِهَايَة..] ! (اخر مشاركة : البريء - عددالردود : 704 - عددالزوار : 69580 )           »          ســجـل حـضــورك بالصـلاة علـى النبي (اخر مشاركة : البريء - عددالردود : 72 - عددالزوار : 10449 )           »          سجل دخولك وخروجك بالاستغفار (اخر مشاركة : البريء - عددالردود : 81 - عددالزوار : 16422 )           »          همسات قبل حلول شهر رمضآن المبارك .. (اخر مشاركة : البريء - عددالردود : 9 - عددالزوار : 9948 )           »          عندك مشكلة..تفضل مع دكتوره دبدوبــ،،ــهـ (اخر مشاركة : البريء - عددالردود : 166 - عددالزوار : 42136 )           »          ريال مدريد واوساسونا بث مباشر (اخر مشاركة : البريء - عددالردود : 2 - عددالزوار : 3343 )           »          خمس وعشرون عاماً من عمري قد مضت ،، (اخر مشاركة : البريء - عددالردود : 5 - عددالزوار : 8279 )           »          اهـــدي بيت شعر لـ اللي في بالــكـ او لـ اي عضو . (اخر مشاركة : البريء - عددالردود : 237 - عددالزوار : 39669 )           »         
 

وداعاً أيها التوأمان

 
قديم 01-04-2007   #1
 
الصورة الرمزية الفارس البلوشي








مؤهلاتك بالحصن
  عدد نقاط تميزك بالحصن : 3793
  المستوى : الفارس البلوشي قدراتك العقلية المتفوقة تجعلك أكثر حنكة في المواقف الصعبة
الفارس البلوشي قدراتك العقلية المتفوقة تجعلك أكثر حنكة في المواقف الصعبةالفارس البلوشي قدراتك العقلية المتفوقة تجعلك أكثر حنكة في المواقف الصعبةالفارس البلوشي قدراتك العقلية المتفوقة تجعلك أكثر حنكة في المواقف الصعبةالفارس البلوشي قدراتك العقلية المتفوقة تجعلك أكثر حنكة في المواقف الصعبةالفارس البلوشي قدراتك العقلية المتفوقة تجعلك أكثر حنكة في المواقف الصعبةالفارس البلوشي قدراتك العقلية المتفوقة تجعلك أكثر حنكة في المواقف الصعبةالفارس البلوشي قدراتك العقلية المتفوقة تجعلك أكثر حنكة في المواقف الصعبة
  
عدد زياراتك للحصن:
عدد المرفقات :
  الحالة :الفارس البلوشي غير متصل
 

 

!.. رسائلي ..!
 




 

من مواضيعي

الاوسمة

افتراضي وداعاً أيها التوأمان

 

السلام عليكم ورحمة الله وبركاتة

تحيتي المعطره لكم وبعد ..

هذة مشاركتي وقصتي ..



وداعا أيها التوأمان

سلطان وسالم اخوان توأم في مقتبل العمر،بعد ما خلصوا الثانويه قرر سلطان الالحتاق بشرطه وقرر سالم انه يكمل تعليمه العالي ويدرس في كلية ، سالم وسلطان عايشين مع أبوهم وحرمته وامهم توفت يوم كانوا صغار من بعد ما ياها مرض خبيت ، وابوهم ما عنده عيال من حرمته الثانية وحرمت ابوهم تحبهم وتعاملهم مثل عيالها وابوهم يحبهم وايد وموفر لهم كل شي يحتاجونه.

سلطان وسالم متفاهمين في كل شي سواء من ناحية اللبس والاكل والذوق وهم يحبون بعض وايد وكل واحد فيهم يعرف اسرار الثاني و كان في يرقدون في غرفه وحده مع انه البيت كبير وفي حجر خاليه وايد ، وكانوا متعلقين في بعض لدرجه الواحد فيهم ما يتخيل حياته بدون ثاني ، وكان ابوهم كان يخاف عليهم وايد من الحسد وكان دوم يقولهم لا تلبسون شرات بعض ولا تظهرون ويا بعض جدام الناس وايد وهم كانوا يتشابهون لدرجخ انه محد يقدر يميز بينهم الا بصعوبه.

سلطان كان عنده هوايات وايد مثل كرة القدم و كمال الاجسام و ركوب الدراجات الي كانت الهوايه المفضله عنده من يوم هو صغير وكان ابوه دوم يشترله دراجات الين ما داوم وقام يشتري حق عمره بروحه. حتى سالم كان عنده وايد هوايات وتقريبا مثل اخوه بس سالم بعد ما دخل الكلية ما قام يحصل وقت عشان يمارس هواياته وقرر ان يتفرغ حق الدراسه بعد ما حس انه ما يقدر يوفق ما بين ممارسة هواياته وبين دراسته واصبح كل وقته قاعد على الكمبيوتر اما يسوي بحث و يدور معلومات او قاعد يتسلى بشي ثاني على النت.

الاخوين كان عندهم وايد ربع بس سلطان كان عنده وايد ربع وكانوا معضمهم الي يحبون ركوب الدراجات فالبر وكان عنده ربع يعرفهم من ايام الطفوله وكان متواصل معاهم وما يقطع عنهم وايد ، حتى سالم كان عنده ربع وايد بس سالم بعد ما دخل الكليه اصبح شبه منقطع عن ربعه القدام الي كانوا معاه فالثانويه اما ربعه مال الفريج كان يشوفهم كل خميس لما يسير يلعب كوره العصر وسالم تقريبا يوميا كان يتعرف على شباب يداد يدرسون وياه فالكليه وهو كان انسان اجتماعي وحبوب وكان ويطلع ويا ربعه وكان معروف بخفة دمه بعكس اخوه سلطان الي كان معروف انه عصبي وما يستحمل المزاح.

في يوم من الايام وكان بتحديد يوم الجمعة بعد صلاة الجمعة وعقب ما تغدوا الاخوان ،جلس سلطان يقلب فالجريده ولمح اعلان عن دراجه يديده نازله السوق وعقبها قرر انه يشتري هذي الدراجه وحب يشاور اخوه وتوأمه سالم الي كان قاعد يطالع تلفزيون وقاعد ينبه ودار بينهم هذا الحوار:

سلطان : سلوم ؟

سالم : هلا ؟

سلطان : سلوم شو رايك اشتري هذي الدراجه اليديده؟ ( ويأشر عليها في الاعلان)

سالم: هات الجريده اشوفها عدل؟ ( ياخذ الجريده من اخوه ويطالع الاعلان) سلطان هذي غاليه وانت ما عندك فالبنك الا 8 ألاف وفوق هذا عليك اقساط الموتر

سلطان: انزين السياره باقي لها قسطين بس يعني الشهرين وبفتك من اقساط السياره.

سالم: خلاص انزين عقب شهرين يوم بتخلص اقساط السياره اشتر الدراجه.

سلطان: لالا بوي باخذها براتب هالشهر وبزيد عليها الي عندي فالبنك والباقي اقساط .

سالم : والله كيفك انا ما عندي اي مشكلة بس هاااااا لا تييني وتقولي عطني 500 قبل راس الشهر.

سلطان: ههههههههاااااي قال 500 قال يا بوي عندي بيزات وثانيا يوم بطلب بطلب من واحد عنده وما بطلب من واحد ما عنده وما سمعت المثل الي يقول لا تطلب من الحافي نعال.

سالم : لا بوي مب حافي عندي نعال ههههههههههههههاااااي.

المهم بعد يومين من هذا الحديث الي دار بينهم نزل راتب سلطان وفي نفس اليوم سار سلطان وخذا الدراجه الي شافها في الاعلان ويابها البيت وكان سالم بعده فالكليه وما عنده خبر ويوم رجع سالم البيت شاف الدراجه وعقبها سار الحجره وشاف اخوه راقد وحشره وقاله

سالم: سلطان قوم قوم الخدامه تقول واحد دش البيت وسرق دراجه ؟

سلطان: شو بلاك انت حاشر الدنيا قول خلصني شو تبغي؟

سالم : يابوي الحق سرقوا الدراجه؟

سلطان نقز من الكرفايه متروع وقال: قول الله ..كله من الخدامه الله ياخذها انشاء الله انا كم مره قايلها سكي الباب العود ولا تفتحينه بس ما تسمع الكلام.

سالم : هههههههههههه انت على طول صدقت .. اسولف وياك محد سرقها انزين عطني سويج باخذ جوله بدراجه وبرجع

سلطان: يلا بوي يلا ,, مب مالت ياهل هذي ,, يبالها واحد قبيض ومب اي واحد يقدر يسوقها.

سالم : انت الحين لا تيلس تذلني يلا عطني سويج؟

سلطان: السويج على التلفزيون .. بس اقولك لا تسرع فيها ولا تضغط مره وحده ترا وايد قويه؟

سالم: انزين بوي كمل رقادك يلا في امان الله .

سلطان : الله يحفظك.


شل سالم السويج وبدل ملابسه ولبس رياضه وسار شغل الدراجه وطلع ودار فيها فالفريج شوي ورجع البيت.

بعد مرور ثلاث اسابيع تقريبا من هالسالفه ،، نزل مطر فالبلاد والجو صار ماشي احلى عنه وشباب كلهم يظهرون ويسيرون البر بسيارات ودراجات و يوم نزل المطر كان سلطان في الدوام وحاول بكل الطرق يترخص من الدوام عشان يسير البر بدراجته اليديده الي ما كملت شهر بس الضابط المسؤول عنه فالدوام ما رخصه المهم رجع البيت اليوم الثاني بعد ما وقف المطر وهو قاعد يتغدى فالبيت رجع سالم من الكليه وشافه وتم يسولف وياه ويخبره انه سار البر ويا ربيعه يوم نزل المطر وعن المواتر والدراجات الي شافها فالبر والمهم سلطان تحمس وايد حق الطلعه وفجأه السما غيّمت والجو يوحي انه بينزل مطر،، وفعلا بعد ما غيّمت السما بدقايق نزل مطر ونش سلطان وبدل ملابسه وقال حق سالم..

سلطان: يلا سلوم قوم تلبس اليوم ما برحمها الا اطلع جيمتها ( ويهز سويج الدراجه بيده).

سالم : سير بروحك انا تعبان ياي من الكليه وفوق هذا باجر وراي امتحان وتسليم نهائي حق البروجكت وانت ادريبك ما بترجع البيت الا بعد المغرب.

سلطان: خلاص بوي انت خلك ويا بروجكتاتك وامتحاناتك وانا بتصل بــــ بسيفوه احسن لي
( سيف ربيع سلطان من ايام الثانويه وهو بعد يحب الدراجات).

سالم: انزين بوي انا بسير ارقد شوي وانت سير جابل ربيعك سيفوه.

طلع سلطان من البيت وتم يدور فالفريج بدراجه الين ما يوصل ربيعه سيف عشان يسيرون البر رباعه وهو قاعد يدور فالفريج سمع صوت دراجه على الشارع الرئيسي وقال في خاطره هذا اكيد سيفوه المهم طلع صوب الشارع ولمح ربيعه سيف ياي مسرع من بعيد وماسك الخط اليسار من الشارع وسلطان كان يمشي شوي شوي على الشارع ويتريا ربيعه يوصل جريب منه عشان يضغط معاه وكان في سياره على الخط اليسار من الشارع و صاحب السياره لما شاف الدراجه يايه بسرعه من ورا وهي كانت دراجة سيف ربيع سلطان فخاز عن السيد اليسار وراح على السيد اليمين يعني على الخط نفسه الي كان سلطان عليه بس سلطان ما كان يطالع جدام بنتباه لأنه كل شوي يصد ورا ويطالع ربيعه واول ما وصل ربيعه جريب منه ضغط سلطان وسرع ولما صد جدام تفاجأ بسياره جدامه ودعمها وطاح عن الدراجه وراسه جاس الرصيف بقوه وفي نفس اللحظه فارق الحياة ونقلوه المستشفى على طول لكن من دون فايده.

تلقى سالم خبر وفاة سلطان الي كان مثل الصاعقه واصبح بدون نصفه الثاني وكان سالم يعتبر سلطان اكثر من انه اخوه وتوأمه و كان كل شي بنسبة له ومن الحزن الشديد على وفاة اخوه ما طلع من البيت اسبوعين و وقف دراسته فالكليه وجلس فالبيت يكابد احزانه ويحاول يتصبر على فراق غاليه وكان محتفظ بأي شي يذكره بسلطان معاه فالغرفه واصبح شبه وحيد وما قام يطلع من البيت الين ما قرر انه يعيش حياته من يديد ويآمن بقضاء الله وقدره.

بعد مرور ثلاث اشهر من وفاة سلطان كان سالم كله يالس فالبيت وما عنده شغله وكان موقف من الكليه وما يقدر يكمل الفصل الا السنه اليايه، ومع الايام قام يظهر يدور فالفريج ويلعب كوره ويحاول يغير من حالته شوي ومعظم ربعه كانوا يطلعونه معاهم لما يسيرون مكان عشان يخففون عنه ويخلونه يعيش حياته طبيعي .

في يوم من الايام لما سالم كان ساير الملعب شاف بصدفه ربيعه محمد الي كان وياه فالثانويه وسلم عليه ودار بينهم الحديث:

سالم : هلا بو جاسم ؟

محمد: هلا والله هلا؟

سالم: اشحالك محمد عساك بخير ؟

محمد : بخير دامك بخير .. وينك يالقاطع من ايام الثانويه مالك شوفه؟

سالم : والله ظروف وكليه ومشاغل.

محمد: ماشاء الله تدرس فالكلية؟

سالم : هيه ادرس فالكليه .. تعال خبرني شو عنك انت؟ شو تدرس ولا اداوم مكان؟

محمد: لا يا ريال مثل ما تشوف بطالي .. وصار لي على هالحال سنتين.

المهم تموا يسولفون ويا بعض والين ما كل واحد خذا رقم تلفون الثاني واتفقوا على انهم بيتلاقون وبيظهرون ويا بعض يوم الخميس، ومر يوم الخميس وتلاقوا ويا بعض ومن بعدها توالت اللقاءات فيما بينهم، وفي يوم من الايام كان محمد عازم سالم فالمزرعة مالتهم وسالم سار العزيمه وكان فالمزرعه وايد شباب وكلهم كانوا ربع محمد وعقب ما تعشوا يلسوا الشباب نصهم يسولفون ويا بعض ونصهم يلعبون ورقه والي قاعد يطالع تلفزيون المهم مرت الساعات وفي الآخر نش واحد من الشباب وسار صوب السياره وياب كيس اسود وكان فالكيس قواطي خمر وقام الريال يوزع عليهم واحد واحد الين ما وصل عند سالم وسالم في حياته ما شرب خمر او داخ جقاره وقال حق الريال ما اشرب والمهم نش محمد وقاله:

محمد: سلوم اشرب يا بوي ما بتخسر شي الا قوطي واحد؟

سالم : لا يا بوي ما اشرب؟

محمد: ما عليه يا بوغنيم تردني .. ما عليه؟

سالم: يا بوي انا ما اشرب هالسوالف!

محمد: انزين الا قوطي واحد ما بتخسر شي .. الشباب كلهم قاعدين يشربون ما يستوي انت تيلس تتطالعهم؟

سالم : خلاص انزين .. بس قوطي واحد وعلى مسؤوليتك.

خذا سالم قوطي الخمر وشربه وكانت هذي غلطة عمره ، وعقبها سالم استوى شبه مدمن على الخمر وكان كل يوم يسير عند محمد فالمزرعه ويشرب وفي يوم من الايام وهو سكران جرب الحبوب المخدره ومع الايام اصبح مدمن عليها. مرت تقريبا شهرين وسالم على هذي الحال وكان العام الدراسي راح يبدا بعد ايام وسالم حاول يترك هالسوالف ويرجع لدراسته لكنه ما قدر ويوم بدا الدوام فالكليه رجع وداوم ومر الاسبوع الاول بدون شرب وبدون حبوب مخدره لكن حس نفسه ما يقدر يصبر عليهم ورجع يشرب و يستعمل حبوب مره ثانيه وكان يداوم فالكلية بشكل متقطع ورجع لنفس الشله الفاسده الي علمته الشرب والفساد وترك الكليه.

اهل سالم كانوا ما كان يدخلون في حياته الخاصه وايد وكانوا مخلينه على راحته ويصرفون عليه وهو كان الابن الوحيد الي باقي لي بو سالم . مع مرور الايام عرف ابو سالم ا انه ولده سالم يشرب ويستعمل حبوب ، ابو سالم كبير فالعمر شوي وهو حاول انه يدخل و يمنع سالم من هالسوالف اكثر من مره ولكن ما قدر وحرمه من المصروف اكثر من شهر وقاله بطردك من البيت و بسلمك لشرطه لو ما ودرت هالسوالف. وفي يوم من الايام كان سالم راجع البيت في وقت متأخر وشافه ابوه وقاله
أبو سالم: سالم وينك الين هالحزه؟

سالم: ماشي تعشيت وقعد ويا ربعي والحين رديت.

أبو سالم: أي ربع هذيل الي تيلس وياهم الين الساعه 4 الفجر؟

سالم: بس يالسين نسولف وما نسوي شي.

أبو سالم: اسمع يا سالم مره ثانيه لو رديت البيت بعد الساعه 12 لا انا ابوك ولا انت ولدي وما ادش البيت مره ثانيه فاهم؟

سالم: يابوي انت هيش فيك كله معصب علي هذا وانا ما اسوي شي وانت كذا تعاملني وين لو اسوي شي غلط؟

أبو سالم: أبد ما سويت شي غلط كل يوم راد البيت متأخر وريحتك كله خمر وطفاسه وتقول ما سويت شي؟

سالم: روح يا بوي صدق ما عندك سالفه.

أبو سالم: تقل ادبك معاي يا سالم , لا ما اصدق انك سالم الولد العاقل الي في يوم ما قل ادبه معاي ولا قالي كلمه غلط.

سالم: تعرف يا بوي احسن شي اسويه شو ؟ اني اطلع من هالبيت عشان تفتك من ويهي وعشان ما اقل ادبي معاك مره ثانيه.

وفعلا بعد هالحديث الي دار بينهم طلع سالم من البيت وقرر انه يترك البيت للأبد وانتقل للعيش في شقه مع واحد من ربعه الي يتاجرون بالحبوب المخدره مع الوقت اصبح يتاجر معاه بالحبوب المخدره.

الشرطه كانت تراقب الشقه الي ساكن فيها سالم ويا ربعه لأنه الشقه فيها كميات كبيره من المخدرات واسلحه مهربه ورجال المباحث كانوا متواجدين بشكل يومي بالقرب من البنايه وفي يوم من الايام قرروا رجال مباحث بالقيام بعلمية مداهمه للشقه وفعلا دخلوا الشقه بالقوه وصار اطلاق نار بين الشرطه والموجودين فالشقه وقت اطلاق النار اصيب سالم برصاصة في صدره وتوفى بعد ما عاش فتره تعيسه بعد وفاة توأمه سلطان وانتهت حكاية التوأمين الي كان يضرب فيهم المثل في التفاهم ومحبة واصبحوا ذكرى حلوه وتعيسه في نفس الوقت.

مثل ما شفنا فالقصه انه الهويات الخطره ورفقاء السوء والبطاله وقت الفراغ الكبير الي مب مستغل في اشياء زينه وبعد الاهل وعدم مراقبتهم لأبنائهم وضبط افعالهم مبكرا كل هذا يؤدي للموت وتهكله ودمار الشباب الصغار فالسن و كانت قصة سلطان وسالم خير دليل على هذا .

والله يبعد جميع شبابنا من هالسوالف والله يحفظهم لأهاليهم وحبايبهم والله يصلح بالهم ويحقق مرادهم.


ولكم مني أجمل وأرق تحية.

 


التعديل الأخير تم بواسطة الفارس البلوشي ; 01-04-2007 الساعة 05:42 PM.
الفارس البلوشي غير متصل   رد مع اقتباس
 
 
إضافة رد

مواقع النشر (المفضلة)


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 02:47 PM.


Powered by vBulletin® Copyright ©2000 - 2022, Jelsoft Enterprises Ltd. , Designed & TranZ By Almuhajir
لا تتحمل منتديات حصن عمان ولا إدارتها أية مسؤولية عن أي موضوع يطرح فيها

a.d - i.s.s.w