هلا ملاكوه بما انك اخترتيني يالله بروح ألبس ملابس الشيف

أحم أحم بما إننا في رمضان وكل البنات يتفنن في الطبخ جبت لكم هذه الطبخة وهي عبارة عن حشوات للسمبوسه وهالحشوات تنفع للفطاير والبيتزا بعد طبعا أكيد كل بنات المنتدى يعرفن يسونهن يعني ما محتاجه لا شيف ولا خبرات
بسني من السوالف بسم الله نبدأ

حشوة السمبوسه بالدجاج

المقادير:-

حبة دجاج
3 حبات بصل متوسطة الحجم طبعا اللي يحب يزود والا يحب ينقص حسب الرغبة
6 فصوص ثوم
2حبة طماطم متوسطة الحجم
حبة كبيرة فلفل حلو
ملح + بهارات مشكله + فلفل حار
صلصه

الطريقة:-

ننظف الدجاج ونغسلها ونبهرها ونسلقها لمدة 40 دقيقه بعد ما تنضج نصفي الماء منها ونخليها تبرد بعدها نبدأ في نزع العظم منها وتقطيعها قطع صغيره ونخليها على جنب.

في صفرية أأأقصد في طنجرة نسكب شوية زيت ونخليه يسخن بعدها نضيف البصل ونخليه على نار هادية لحد ما يذبل نضيف الفلفل الحلو ونغطي عليه بعد دقيقه نضيف الثوم والطماطم نقلب المقادير مع بعض ونغطي عليه لحد ما تستوي بعدها نضيف الملح والبهارات المشكله طبعا في بعض الناس يحبون بهارات خفيفه وبعضهم العكس ونضيف الصلصه نخلطهم ونضيف الدجاج المقطع الى قطع صغيره ونقلب المكونات ونغطيها ونهدئ النار شوي نخليها لمدة دقيقه او دقيقتان ونطفئ النار خير شر.

ونبدأ نحشي عجينة السمبوسه أو الفطاير


حشوة السمبوسة باللحم المفروم

المقادير:-
كيس أو كيسين لحم مفروم
3 حبات بصل متوسطة الحجم
6 فصوص ثوم
2حبة طماطم متوسطة الحجم
حبة كبيرة فلفل حلو اللي ما يحب الفلفل يحذفه من المكونات ويضيف أي نوع خضار
ملح + بهارات مشكله + فلفل حار


الطريقة:-

نغسل اللحم المفروم ونخليه على جنب
نخلي الطنجرة على النار نضيف شوية زيت نخليه يسخن ونضيف البصل لحد ما يذبل نضيف الفلفل الحلو نخليه لمدة دقيقة ونضيف الثوم والطماطم نخليه الى ان ينضج بعدها نضيف اللحم المفروم ونضيفله الملح والبهارات والفلفل نقلبه واللي يحب يضيفله شوية عصير ليمون نقلب المكونات نغطيه وعلى نار هادية لمدة 10 الى 15 دقيقه ونطفي النار وصارت الحشوة جاهزه.

حشوة السمبوسة بالخضار:-

المكونات:-

2 حبة بطاطا كبيرة
3 حبات بصل متوسطة الحجم
2حبة طماطم متوسطة الحجم
حبة كبيرة فلفل حلو
حبة جزر كبيرة الحجم
ملح + بهارات مشكله
صلصه حسب الرغبة واللي ما يحب يضيفها يحذفها من المكونات

الطريقة:-

نقطع البطاطا والجزر قطع صغيرة أو متوسطة نخليها على النار ونضيفلها شوية ملح وفي الوقت اللي تغلي فيه البطاطا والجزر نخلي طنجرة ثانية على النار ونضيفلها شوية زيت نضيف البصل ونخليه الى ان يذبل نضيف الفلفل الحلو وبعد دقيقة نضيف الطماطم الا ان ينضج نضيفله شوية ملح والبهارات والصلصه طبعا ما ننسى البطاطا والجزر أول ما ينضج على طول نصفيه ما نخليه لحد ما ينهرس لانه اذا انهرس بتضيع الحشوة المهم نضيف الجزر والبطاطا على البصل وباقي المكونات ونقلبه ونطفي النار .

طبعا هناك الكثير من الحشوات وفي اللي يحب لفائف السمبوسه بالجبن أوبالمقانق

شاكرين لكم حسن متابعتكم
وفي ختام الحلقة تقبلوا فائق احترامي وتقديري الشيف (سكون)