بسم الله الرحمن الرحيم
عيدكم مبارك
وعساكم من عوادة
"" اللهم بارك لنا في عيدنا وأعده علينا أعواماً عديدة ""
أولاً عيد الفطر معنا نحن ثلاثة أيام فقط
وكما نعرف بأن كل منطقة وولاية من ولايات السلطنة لها عاداتها وتقاليدها
قبل العيد بيومين نعد الحلويات كالعادة طبعاً وليلة العيد نوزع الحلويات للأهل والأقارب ..
البعض منا ينام والبعض الأخر ما ينام نصحى الصباح ونصلي صلاة الفجر ومنه ننتقل إلى المطبخ لنجهز المدخان ونسوي الشاي والقهوة العمانية الأصلية بالهيل والزعفران والماء الورد لو أنه كل الأيام يتواجد الهيل والزعفران والماء ورد بس في يوم العيد له طعم غير مع أني ما أشرب القهوة
نقوم بوضع الفاكهة في صحن كبير ونضبط الحلويات في صحن ونرتبة ترتيب جميل والحلوى العمانية الخاصة بالزعفران أهم حاجة فالفوالة أيضاً ..
بعدين ننقل الفوالة في الصالة ونجهزها علشان أللي يجي يسلم سلام العيد يتفول ويروح
نجيب المدخان وطبعاً العود الحطب مع عطر العود الأصلي لازم يكون موجود علشان نتبخر به
تجلس عاد الوالدة الله يخليها من يتجهز الوالد وأخوي تبخرهم وتعطرهم ويروحوا المسجد لصلاة العيد ..
عااد نحن البنات والوالدة نبخر ملابسنا ونروح نتجهز ونتدلع من يرجعوا مصلين الرجال نسلم على بعضنا بعض
نستقبل الناس للسلام وبعدين لما نحصل فرصة نروح نسلم على الشياب جدي وحبوتي الله يخليهم لنا دوووم ونشوفهم في كل عيد
ونمر ع الأهل نسلم عليهم كلهم من نخلص يرجع الوالد يذبح ويجيبوا الذبايح المطبخ طبعاً الحريم تو دلوعات ما مثل قبل يحبن يجلسن في مكان بارد نتساعد نحن والوادة في تنفصيل اللحم وتعزل الوالدة حل وجبة مقلي اللحم والغدى المكبوس لحم ..
من نخلص ناكل عرسية اللحم مع الترشة
لين يجهز المقلي وناكلة
وطبعاً الوالدة تنتقل يمين يسار تتابع الغدى لأن الرجال يتغدوا بس الحريم ما يتغدوا
من يجهز الغدى ويخلصوا مصلين الظهر يتناهمو الرجال بيت جدي علشان يتغدوا ..
لأن بعد الغدى تكون عندهم شغلة تجهيز التنور الوالدة وملاك يغسلو اللحم من الكركم والملح ويبهرنه ويخلنه جاهز علشان يجي الوالد ويشلة ويضبط أمورة هو وأخوي
بعدين تقوم الوالدة بطباخ اللحم مع الخل
هذا أول يوم بالنسبة لنا يوم متعب جداً من الصباح لين العصر ونحن نشتغل فالبيت ...
ثاني يوم يكون المشوي
وثالث يوم نسوي مشاكيك بالليل وجبة عشى
وهذا العيد عدنا شغل واستقبال ناس ونروح نسلم سلام العيد ...
ملاك الشرق
&&&لا مستحيل عند أهل العزيمة&&& |
|