 |
منتديات حصن عمان
(http://www.hesnoman.com/vb/index.php)
- برج النقاش الحُر
(http://www.hesnoman.com/vb/forumdisplay.php?f=146)
- - °° مواضيع ..قضايا..ونقاش بالعامية °°
(http://www.hesnoman.com/vb/showthread.php?t=36968)
°° مواضيع ..قضايا..ونقاش بالعامية °°
بسم الله الرحمن الرحيم السلام عليكم ورحمة الله وبركاته ***** اهلا برواد و زوار منتدانا الغالي " حصن عمان" نلتقي معكم في برج النقاش الحر في موضوع متجدد: °° مواضيع ..قضايا..ونقاش بالعامية °° ***** موضوعنا هذا سيكون بإذن الله جسر من جسور نشر المعرفة والحوار الجاد عبر طرح مجموعة من القضايا ونقاشها بالعامية , نهدف من ذلك تمتين المحبة و المودة بين اعضائنا في اطار ثقافي هادف رزين , آملين ان يكون هذا الموضوع مرتعا خصبا للتآلف و تبادل المعرفة و توحيدها في اطار عامي واضح ***** الموضوع لكم و انتم منه و اليه نجاحه من نجاحكم و رقيه من رقي افكاركم و غنى معرفتكم و حجم ثقافتكم ***** تقبلوا فائق التحية والاحترام تحياتنا وعد الوفاء - ومضة حياة |
نبدأ بإذن الله اولى مواضيعنا ***** " المرور ونزيف الارواح على الطريق " ***** اممممممممم كلنا نعرف إن كل الدول المتطورة المتقدمة شوارعها زحمة وعفسة والحالة م ناحية المرور واكثر من عمان بعد http://www.sarayacdn.com/P294yrfu/mo...827bd3ce59.jpg ونحنااا عندنااا فئة كبيرة من الشباب يحتاج لهم ضرب ، تشوف كل واحد منهم مستعجل ومتحمس وحالته لله ترى الشارع ما طاير والمكان بتوصلوا له يعني بتوصلوا له لييييش السرعه لا وبعد بعظهم أصحاب الدوامات وخاصة لي عندهم مواعيد تشوفه ع سرعته وحماسه ويتجاوز بتقول خلاص محد يشتغل غيره ومحد ملتزم بمواعيد غيره ..ألخ وهالشي محير جدا لأن حوادث الدول المتقدمة أقل بكثير بالنسبة للحوادث لي صايره معنا بالرغم ان الدول المتقدمة مثل ما ذكرت سابقا ازدحامهم أكثر منااا :puppyeyes: هذه صورة م شارع ف سلطنة عمان تبين لنا الفرق الكبير ف الإزدحام http://www.traffic.gov.om/thumbnail....article_medium يمكن يكون أحد الاسباب ف الفوارق م بينا وبين الدول المتقدمة : ان شبابهم يعرفوا قيمة حياتهم وحياة لي معهم أكثر م شبابنا لي أغلبهم يطغي عليهم التهوور المفرط للأسف ،، ومثل ما قيل عنا إن حرب عمان الحوادث :sneaky: وهالخبر انذكر حتى ف الجزيرة والصورة توضح أكثر http://aljazeeratalk.net/upload/1/1162675980.jpg م هالمقدمة الغاوية يعني الحلوة :D ،، ودي نتناقش بهالموضوع ،، ونحاول نحط النقط فوق الحروف عسى ولعل نطلع بشيء إيجابي يفيدنا ويخلي شبابنا شوي يركد ويدرك معنى الحياة وان الله سبحانه وتعالى أوصانا بعدم رمي النفس ف التهلكة ونبتعد تماما عن السرعة المفرطه والتجاوز الخطير اللي دمر شبابنا واللي اذرف دماء شباب ف مقتبل العمر :wheelchair: !! امممممممم خلونا نبدأ بأسئلة حيرتناااا ،، ونحاول نجاوب عليها بشفافية ونعرف السلبيات والإيجابيات ،، شو رايكم ؟! :shiny: ... هل شبابنااا الحلوين سواء بنات أو أولاد أو حتى شيابنا اللي يشوف سياقتهم يقول مره هناك الخبرة ،، ما كأن الشياب بعضهم ماخذين الليسن ع كبر يعني بوقت متأخر ،، مهم نرجع لسؤالنا هل هؤلاء يفتقدوا الشعور بالأهمية ؟؟ أو عدم وجود الرغبة القوية في التمسك بالحياة؟؟ أو عدمالشعور بأهميتهم في المجتمع ؟؟ أو بنظركم شو هي الأسباب سواء سبب ظاهر او سبب خفي لا يعرف إلا السائق نفسه ونحس بأن هالسائق غير مهتم تماما بالحياة ومخاطر السرعة والتهور الملحوظ ؟؟؟ ! لييييييييييش الأغلبية منا ما يهتم بسلامته وسلامة غيره ؟! ليش كل همنا نوصل للمكان المعين ولو هو الدوام بالوقت المحدد ؟؟! للعلم ترى التأثير النفسي اللي نشوفه يصير للسائق يعد سبب من أسباب مهمة جدا اللي تدفع السائق الى السرعة أو التهور أو الاهمال .. ألخ اخيراااا شوو رايكم نحاول نحور هالموضوع من الناحيةالنفسية وبكذا ينقلب مسار البحث والتحري من الشارع الى محاولة فهم نفسية الساااااائق نفسه :S_013: مووو المفروض لماااا يشتري الأب لإبنه الصغير لعبة السيارة علشان يلعب فيهااا أنه يعلمه كيف السيارة تتحرك وانه ما يخليها تتحرك بسرعه علشان ما تنصدم ف شي كبير جدار او أي شي موجود ف البيت وبعدها تتكسر وتتحطم ؟! وأنه يوضح له قواعد المرور وقوانين الشارع وكيفية المسار فيه علشان ما يفكر أن السيارة مجرد لعبةبيده!!!! وانها حتى لو كانت لعبة لازم يكون لها قواعدوقوانين :showoff: اريد نقاشكم واضح حول هذه القضية ونحاول قدر ما نقدر نستخلص م نقاشنا الحلول لنااا وللجميع نبا نقاش عامي فصيح ،، يمكن م خلال نقاشنا راح نستشف أخطائنا ونتعلم منهاااا |
الشباب الطائش المتهورين في السياقة يبو كراخ بمقشاع ويربطوا بصاغ على جدار ويخلوا تحت
الشمس عوم إلين يقولوا التوبة ما راح نكون متهورين ونقتل ولاد الناس بسبب تهورنـا .... أكيد أسباب الحوادث كثيرة وخاصة من الشباب فتحصلوا الواحد يبقبق في التلفون وينسى نفسه إنه يسوق سيارة إلين تستوي الكارثة ، ومن أسباب الحوادث السرعة الزائدة عن حدهـا ، عادي عند الشباب الطائش يوصل سرعة السيارة 280 ! وما يفكر بنفسه ولا في أهله الدنيا بايعينها ، الشيخ أحمد الخليلي يحفظه الله أعطى فتوى إنه أي شخص عمل حادث وسرعته كانت أكثر من 140 راح يعتبر ذلك إنتحار وقتل نفسه . وكذلك الواحد لما يسوق سيارته يسوق وهو راقد ويغصب على نفسه ويقول بكمل إلين أوصل البيت ! وأيضا ً بعض الشباب ينظروا للهيبة لما تكون عنده مثل سيارة سكايلن مزود ( جيتي آخر موديل ) وتسمعوا صوته من بعيد مأذي الجيران والسرعة معطنه 280 شو يريد هذا من الدنيا ! صدق المثل اللي يقول " الشيفة شيفة والمعاني ضعيفة " . بعض من الشباب دهج ما يعرف صالحه من طالحه ! علاج هذلا الشباب المتهورين : النصح ، الإرشاد ، التوجيه ، الترغيب بمعنى أن يتلقوا الكثير من التوعية المرورية والإرشاد في المجتمع . ويا ليت تطبق مادة في المدارس في الحادي عشر أو الثاني عشر بإسم المرور حتى تتم توعيتهم . بارك الله فيك يا ومضة حياة . |
جبتها البراء ،، اغلبية الشباب تلفونهم ف يدهم سواء يلفوا دوار ولأ ماشين بشارع فيه منحنيات عادي الأمور طيبه عندهم ،، ياليت يكتفوا بالمكالمات بعضهم يطرشوا مسجات والحاله لهالدرجه ضرورية الرساله ما تقدر تنتظر ليما توصل وترد عليها !! ترى الناس ما طايره متناسين تماما ان بمجرد غفلة بسيطه عن السياقه يصير اللي ما نتمناه بعدين الندم ما قايم ينفعنااا امس وانا طالعه م الدوام توقفنا عند اشارات المرور وكذا والإشاره خلاص بتوصل الصفرا والأخ لي واقف سيارته جنب الشارع لي واقفه انا عليه جالس يطرش مسجات وبسبب زحمة السير شوي لي قدامي اسمع هرنات بيب بيب فاستغربت انه كاشخ وعيونه ع الفون ويكتب مسج والأإشاره خضراء عاد خخخخخخخخخ بعدها تحرك واشوفه ف الشارع سيارته تروح يمين يسار ومبين عليه صغير هههههه ما قادر يوازن السياره والسبب تلفونه ( صدق ان هم يبكي وهم يضحك ) يعني شو رايكم بهالموقف ؟! |
اول شيئ حلوه الصورة مالت الضفادع ..خخخخخخخخخ
مرة مكشخة الموضوع ومبروزه ..هعهعهعهع ^_* امزح خيتو .... سيري غيريهن حبوه .. عن يضحكوا عليج الخلق .. هع ::::: ابوي هذي الايام السيارات صايرة موضه .. اكثر من انها حديد يتنقلوبه ... يعني بو عنده سيارة اقوى واسرع يكون فوق مكانته عند الشباب .. عالي العال على قولتهم .. يعني تو يوم انا اسرع واخطف على واحد من الربع بسرعة 200 .. اكون رجال وقتها والكل يتكلم عني .. واني انا اسرع وما اخاف وقلبي قوي .. وماشي حد كماي ..!!! وكلها حادث واحد .. ويصطلب .. لكن بعد موه .. بعد ما يذبح عمره بالتكسير ويمكن يخطف على كم روح ويشيلها معه ..! وبعدين يندم ..! يوم ماشي فايده ... شوارعنا غاويه .. بس شوية تعديلات وتوسيع ومرة تكون حماس .. بس العقلية مالت الشباب لازم تتغير .. ويحسون بقيمة ارواحهم الي عاقينها فصوب ولا مهتمين بيها ..! وبعدين اطلب من حكومتنا الرشيدة توفير حلبات سباق حال الشباب عشان يتصرقعوا هناك يوم يببغيوا .. هع يسلمووو ومضة على الموضوع النايس ... مره حماس بس مادري ما عرفت احلل واكتب براحتي مو مثل الفصحى احس ولا شو رايج *+* |
اقتباس:
صدجك ان الشباب الطايشين يبوا حد ينصحهم ويرشدهم ،ترى الدنيا وايد غارتنهم وما شايفين حد كأن عيال العرب ما يسوا عندهم وعاد من يمسكوهم سيارة يديده تشوفهم ضاربنهم الغرور والبطرة ما حد لها وهناك الكثير من الاسباب منها انهم يرجدوا الى الضحى وتلجاهم متاخرين عن الدوام وعاد يزر ذيك السيارة وما يهمه الا يوصل الى دوامه وما يحسب حساب للطريج ..وهناك سبب غيره ترى الشاب من يوم وهو في الاعدادية تلجاه يسوج وعاد السواجة اصبحت شي روتيني ويحسب نفسه ما حد يبوه في السواجة ..واذيه نوع من الاهمال البراء النقاش معك فله هههه عاد ما خروفه عليك عندي اسئلة يا ريت تناقشنا فيها *مسئوليه الحوادث في عمان ..برايك مسئولية الشباب بس ؟يعني الطرق وتصميم الحكومة لها مب سبب من الحوادث؟ *الاستماع للمسجل والراديو..ما ينفع يكون أحد الأسباب الي تأدي للحوادث ..على فكرة غالبا ما يتم ادراجه ضمن أسباب الحوادث..شو رايك بذيه الكلام؟ |
اقتباس:
ههههههههههههههههه عاد ما موقف اباهم نازلين له وصاينه على شداغه كون ينتبه الخطرة وما يشغل نفسه بالتلفون تعرفي استخدام التلفون له وايد من المضار للسايج تخيلي انه يسوج وحد اتصل فيه وخبره خبر مزعج..بتلجيه يسرع ويسوج بلا حياده ولا احد يتصل فيه ويستعجله ..عاد بيسوج بسرعه عشان يوصل واذيه الاشياء تخليه ما يركز في الطريق وعد الوفاء النقاش معك يزيد الموضوع حلى في حلاه اخيتي **من الاسباب الي ادت للحوادث السكر وشرب الخمور..في رايك ايش تسوي الحكومة.. والمجتمع عشان يمنعوا المخمور من السواجه ؟ وايش واجب المواطن اتجاه هذه الفئة من الناس ؟ |
اقتباس:
ضفادع ؟؟ من جاب الضفادع في موضوعي ؟ :icon28: هههههههههههه تريد الصدج جالوا لي الهنائي ما يعرف ينقاش الا وهوه يستمتع بــــ السنفونيه الضفدعيه الهاديه ههعععععععع:bleh: الهنائي ما ان الموضوع حماس اذن بتتعلم منه كيف تصيغ الحروفه بالعامية اهم شي لا تخوز من البرزة ههههه عاد الفشار عندهم على بيسه يشتروا سيارات رياضية ويتسابقوا بها ..كأن الطريج حلبه سباق والطرق مب كلها سريعة بعضها مزدوج وضيق وتلجاهم من الشطة يتجاوزوا من الجهة الخطأ ويتفجا بهم السايق الاخر ما جلت لي :innocent: * شو رايك بالطرق المزدوجة المنتشرة في السلطنة.وشو رايك بتخطيطها ؟ |
اقتباس:
لأن بعد ما معقوله بتجلس الدولة تفتش اصحاب السيارات هل هذا مخمور ولأ لا !! بس المنطق يقول ان أهل السكير اذا كانوا عارفين طبيعته يراقبوه ويسحبوا عنه مفتاح السياره لأن بهالحاله مراح يكتفي يضر نفسه وبس لا بعده بيضر لي حوليه ويصدم السيارات وحالته لله !! يعني سكير عقله طاير فكيف بعد يقدر يسيطر ع سيارته ! خليه يسيطر ع نفسه اذا قدر ! واللي اناا اعرفه إن الشرطة اذا مسكت شخص يسوق سيارة وهو ف حاله سكر يسحب الليسن ،، ويستاهلوا زيادة عقوبات تحددها الدولة بحق هالسكير لي بيقضي ع حياة الناس لأن وبكل بساطه عقله يشبه عقل المجانين بالعماني مجينينه وبالإنجليزي كريزي وبالفلبيني لوكو وواجبي كمواطن ما اسكت اذا شفت هالحاله ف اي شخص سواء يقرب لي او لا ابلغ عليه الشرطه علشان يشوفوا دورهم ،، بكذا نقذت الناس ونقذته هو بالدرجة الأولى لأن مثل ما ذكرت سابقاا ان السكير بلا عقل فما يعرف شو لي يسويه والشرطه بترد له الصاع صاعين وساعتها م بيقرب صوب الخمر |
اقتباس:
هههههههههههه بيني وبينج الضفادع مسويه شغلها ..خخخخخخخ :clap: .. يعني شوية تكشيخه على تزيين للموضوع :S_010: .. بس يعني لو شيئ كذا موسيقى هاديه بتكمل القصة ..هعهعهعه :smoke1: شوفي عن موضوع التخطيط اممم انا اشوف يبالهم شوي يركزون على حاجة الناس حج الشوارع ووين الاكثر استعملا ً لها .. يعني اكو بعض الشوارع يبالها تكبير عشان ما تصير الزحمة .. واكو بعض الشوارع جدا ً قديمة ويبالها تغير بالكامل مع توسيعها .. مثل شوارع معبيلة ومنها الصناعية طبعا .. المكان صاير كريه جدا .. ومنها بعد مثلا سوق الخوض .. يحتاج لازدواجيه .. كل هذي الامور والاماكن تحتاج من حكومتنا الرشيدة انها تراعيها .. يعني تو انا بقولج مثلا الشارع الرئيسي لمسقط .. شيئ اماكنيه انهم يكبرونه ويحطونه على الاقل اربع خطوط ومع بناء جسور بدل الدواوير الي ما تخلص من صوب السيب الى بركا مثلا ... وعندج الشارع السريع بصراحة انا اشوفه عبط انه محطوط ثلاث خطوط .. المفترض يحطونه 4 خطوط .. تراه شارع سريع وحج المستقبل مرة وحده .. بس تراه حراميه لاه .. لازم يحطون ميزانيه مرة ثانيه عشانه ..!!! الطرق المزدوجة أغلبها يحتاج لها توسع .. فالناس تتكاثر ما شاء الله والتفكير في المستقبل لازم يبدأ من الحين .. وتخطيطها سليم نوعا ما مجرد لمسات مستقبيلة اذا كان التعبير صحيح ويكمل الموضوع ^_* ووووووبس .. هع :cloud9: |
السرعة سببها الرئيسي الشباب الطايش مايعرفوو مصلحةنفسهم
ألحين واحد كبر الفار ماسك سيارة ويخمس يمين ويسار عبالة التخميس بيمدحوة وبعض الاشخاص يلقبوو ع اللي يسرع لقب وهاللقب اكثر ينفخة ويخلية يسرع ويخمس وايضا سالفة الفون عبالة عادي يتكلم واحيانا كثيرة الشباب يتهورو مع بعض يجلسوو يتحدوو بعض فالسرعة لين يطير راس واحد منهم من ناحيتي اللي يسرع بهالطريقة مايخاف الله ول يخاف ع أهلة أبد وإيمانة ضعيف وجدا ول كان فكر بالحياة وفكر بأهلة وناسة والأذى اللي يتسببة لغيرة |
نقاش جميل
كل الشباب الطايش عندهم طاقات بس باختصار مالاقين التوجيية الصح بالاسلوب الصحيح الي يتناسب مع عقولهم وسنهم كل شاب عندة قدرات ومهارات بس ما لاقي الي ياخذ بيدة وما اوافق أخي الهــــــــــنائي لان اذا فتحولهم المجال ساحات للعروض بيزيدوا الطين بللة وما بتنحل المشكلة من جذورها اتوقع السبب الحقيقي الفراغ الفكري اللي يعيشة الشباب الشباب محتاج الي من يسمعهم ويعيش مشاكلهم ويبعدهم عن الامور السطحية بشغل فكرهم في امور هادفة هذة تنمية بشرية والبشر اكبر استثمار لانهم اساس بناء وتعمير الارض والمشكلة كبيرة تريد من يديرها ويحلها من الجذور لا من السطح بالرادرات وبس الحوار ترتتتتتتب لي عودة |
اقتباس:
اسميه لا يمكن منعه أو التحكم به وهو غير مدرك لما يقوم به فلا يمكن حل هذه المشكلة وماشي في يدي نا الا التبليغ عنه وعلى الجهات المسئوله سحب رخصة القيادة عن كل المتعاطين لهد يه الاشياء وحرمانهم من السواجه تراهم بيجتلوا خلق الله وهمه ما عندهم خبر |
اقتباس:
الهنائي ربك رحمك ..ما تمر في طريق الشرقية ( بدبد - صور كان بتشوف التخطيط على اصوله الشارع جديم من زمن جدتينا ما حد مصلحنة كله مرجع كنه رجعت فقير ..والطريق خربان عند مجاري الاودية وعاد درب العج ( العق ) الله لا يراويك ياه كله تعرجات وضيق وايد وما فيه انارة الحين بس بدوا يحلموا ويسون له انره منجلب مجزرة وايد حوادث فيه حشا وين ميزانية الدوله ؟ ما جادرين يرتبوه او يخططوه صح؟ ولا الطريق السريع الي واعدينا به الى اليوم وباكر ما حد بدا فيه الله يعين بس وفعلا كما جلت اخوي الطرق المزدوجه وايد يستوي فها زحمة وبحاجة الى توسيع |
هلا ومضة ... لا وين سرت له ذاك الطريق .. وشفت كيف وادي العق والحاله الي فيه
كنت صاير وادي بني خالد وذاك الصوب ...هع .. بس انا عاد مريت هناك قبل المغرب بدقائق وواحيت قبل لا تجي الظلمة .. قالوا لي عنه وايد مظلم وحالته حاله .. تحرمت على الناس الي يداومون في مسقط وبلدانهم هناك .. بصراحة الحاله صعبه .. بس عسى يعدلونه قريب .. وايد سمعت ان ارواح راحت بسبت ذاك الطريق .. عندج بعد طريق صلالة الي بصراحة اترحم على حالته .. قسم انك تمشي وتخاف لا تطيح في حفرة ولا تشوف نفسك برا الشارع كله .. *_* ... عسى يكون من الخطط الخمسية .. على الاقل نحلم ان يتعدل الوضع قريب ..خخخخخ |
اقتباس:
هههههههه صدجتي والله الواحد طوله شبر ونص حتى ما طالع من الكرسي تلجيه يشوح ويشوح بسيارته كنه مدخل حلبه سباق ..وكن الشارع شارع ابوه ما حد غيره فيه وه>ا كله نرجعه لعدة اسباب منها الثقة العمياء ..فيعتقد السائج انه يجدر يتلافى الاخطاء لانه اوين سايج محترف -وما عنده صبر وما جادر يظبط نفسه وينتظر - وكله مستعجل الله يهديهم بس كحل العين نورتي حلقتنا النقاشية ه>ي شكرا لك يا غالية |
اقتباس:
الله يعين الناس إلي تستخدم طريق العق وعسى ربنا يرحمنا ويصلحونه في اقرب فرصة واي ذكرتني بطريق ادم - ثمريت ..والله فضيحة شو ذاك الطريق ما يخيلون على نفسهم والله كنا بلانا فقيرة ..تو الواجب على وزارة السياحة بعد تساهم في تطوير ذاك الطريق ترى ناس من خارج السلطنة يجون في الصيف لصلالة ويمرون عليه فيه ميه الف تحويلة والشاحنات داعياتنه ما ينقبل ببيسه عسى يطورونه باسرع وجت الهنائي شو رايك بالدواوير المنتشرة في مناطق السلطنة الي بعيد عن مسقط؟ ما تلاحظ ان بعضها مصممة خطأ؟ !! |
اقتباس:
وكلامك بعد ترتوب ههههه وعين العقل والله الشباب الطايشين يعانوا من الفراغ ..وما حاسين بمدى الخطورة الي راح يسببونها بعدم اكتراثهم بالسيارة وقيادتها كانهم يسوجون لعبة ولما تنصحينهم بيجولوا لك الموت واحد كديه ولا كذيه مصيرنا نموت ما تلاحظي انهم ما مهتمين ابدا؟؟!! يا ترى هل يفتقد أبنائنا الشعور بالأهمية.. أو عدم وجود الرغبة القوية في التمسك بالحياة ..أو عدم الشعور بأهميتهم في المجتمع |
امس اسولف مع اخوي بحكم عمله ف الشرطه ،، قلت له بسألك بس ابا شفافية ف الإجابة سؤالي كان : شعار ( لا تتصل حتى تصل ) يطبق ع كافة الشعب م ضمنهم الشرطه ولأ مجرد شعار وانحط ؟! انصدم م سؤالي حتى انه قال : لا يكون الأخت تشوف ان الشرطه لعب وحط قانون وشعار ع الفاضي ! قلت له : لا الشيخ ما قصدت بس سؤال لاه رد علي : شوفي صحيح ان بعض اللي يشتغلوا ف الشرطه هم وحدهم يخالفوا القوانين لكن ما معناته انهم ما يتعاقبوا ،، الشرطي حاله م حال أي مواطن ينطبق عليه كل القوانين اللي تنطبق ع الشعب قلت : بس لا تنسى ترى الواسطة بعد لهاا دور ،، وابسط مثال اذا واحد مسكه الرادار مخالفة سرعه بإتصال إلتغت المخالفة وكأن شي لم يحدث ! هز راسه مع إبتسامة وقال : سمعتي اللي يقول حاميها حراميها قلت : ايوا سمعت بس ليش قلت كذا ( علشان اباه يفسر لي اكثر ^^ ) رد علي : اصابع يدك مو سوى هذا واحد واثنين ما كل حامي حرامي معناته ما كل اللي ف الشرطه يتحلوا بالضمير والإنسانية فلازم تعرفي شي واحد وحطيه ف بالك زين ،، انتي حاليا ما عليك م غيرك سوي اللي مفروض تسويه واللي هو صح واهلك ربوك عليه والناس انصحيهم اذا تقدري واذا حد سمع كلامك زين بس ما تقولي ان شرطي يسوي مخالفه معناته انا اسوي مثله ولااا تقولي اذا مسكني الرادار بقول عندي اخوي يسوي لي واسطه ويشيل المخالفه ،، خلك محامي عن نفسك وتجنبي الخطأ قدر ما تقدري ..ألخ ( بإختصار سوي لي محاظره ) لنااا تكملة يمكن مع حوار آخر ^^ |
الا عاد على الدواوير الله يستر منها
خخخخخخ .. بعضها ما دواوير وانتِ الصاجه بوابيض ..خخخخخخخ دوار على شكل بيض .. وبعض الدواوير تقول مستطيل بالغلط ..خخخخ والله حالتهن صعبه .. مادري من وين جايبينهم المهندسين !! .. شكلهم اي كلام وبس .. وبعدين بسنا دواوير .. خلاص الناس تتطور .. بس ما عليه نصبر عسى يتغير الفكر .. شوي شوي بنوصل الي نبي له .. لكناهم شيئ الحين انه تكون الفكرة موجوده ... لانه الي الاحظه حتى في الشوارع الجديده بعدنا نشوف دواوير !! مادري شكلهم ناوين عليها نيه *_* ... وانتِ خيتووو شو رايج فيهم ..^_* |
صحيح ان الدواوير تسبب حوداث بس بالنسبة لي اشوفهم افضل م الإشارات تخلينااا ننتظر واجد ^^ |
بس وعد نحن ما قلنا اشارات .. يعني انا اقولج مثلا .. شارع الي بين صحار ومسقط .. لو يخلون جسور بدل من الدواوير .. او انهم يحطون جسور فوق الدواوير .. صدقيني افضل وتخف الزحمه وحتى الحوادث .. ونفس الشيئ التقاطعات الي الحين سكروهن اصلا .. لو انهم يحطون جسور افضل ... لكن اتوقع ان الموضوع بياخذ وقت واذا ما جسور حتى انفاق من تحت .. تيسر على الي يقطعون الشوارع والي ماشين خط من صحار الى مسقط مثلا وهكذا
ولا شو رايج وعد .. صبر شوي ولا ندم للابد ^_^ |
اقتباس:
تذكرت سالفة من كمين شهر سو دوار في احدى الولايات في منطقتنا واللوادم ما متعودين على الدوار وفي اول يوم يفتتحوا الدوار والناس فرحانه اوين فك الزحمة شوي وفي ساعة متاخرة من الليل جاك ذاك السكران وخطف على الدوار بالعرض تراه ما يحيد ان هناك دوار وخربه وكسر كل اللوائح الي فيه هههههههههه قالهم شو هذا من غير الطريق هنا |
اقتباس:
صراحة ما معك في هذي النقطة اشوف ان افضل الاشارات احسن ننتظر شويه . واوافق الهنائي في رايه حلو لو يسون جسور فوق الدواوير بكذيه بيخفون الزحمة ويا ريت يسون اشارات على الدواوير لانهم بينظمون السير فيها وبيقللون من الحوادث فيها |
عاد اذا متأخرين ع الدنيا السلام انتظروا الاشارات ^^ ترى لازم هناك سلبيات وإيجابيات |
اقتباس:
هههههه طلعي من البيت من وجت وما راح تاخرك الاشارات بتطلعي وانتي مرتاحة وبتوصلي في الوقت المناسب موفقه وعد الوفاء |
""لنعمل معا للحد من الحوادث المرورية ""
شعار اسبوع المرور دول مجلس التعاون |
ما اعرف .. لكني ما اشوف اي وقفة صادقه عشان يمنعون الحوادث .. كل يوم تزداد ولا عندهم خبر ..! بس كذا حملات ودعايات على الفاضي .. عمل لا نرى .. وانما دعايات يا كثرها !! .. بو يموتوا بالمئات والالف سنويا ..!
|
اقتباس:
الشرطة تسوي الي عليها ..والباقي على الناس نفسهم ما حد قال لهم سرعوا في الشوارع ولا تلبسوا الاحزمة وما حد قالهم يسوقوا ويلعبوا بتلفونانهم . كلن يحافظ على نفسه والشرطة مب الرب بترد الموت عن الناس |
كلا م ومضة صح أخي الهنائي
ما كل الشرطة أخلاقهم وضمائرهم وحدة ولا لكل شرطي يقوم بعملة على اتم وجهه ومهما الشرطة سوت يبقى شي اسمه مسؤلية الفرد اتجاه نفسة وطنة الاغلب يأخذ الشعارات بستهتار واللعب والنتيجة واضحة واللواسطة لاعبة دور كل واحد عندة قريب او صديق في الشرطة يسرع ويلعب ومايهمة لان المخالفات محذوفة عنة |
| الساعة الآن 10:15 AM. |
Powered by vBulletin® Copyright ©2000 - 2025, Jelsoft Enterprises Ltd. , Designed & TranZ By
Almuhajir
لا تتحمل منتديات حصن عمان ولا إدارتها أية مسؤولية عن أي موضوع يطرح فيها